Fihaonambe Diplomatika Antalya andiany faha-3 : Mihamafy orina ny fifandraisan’i Madagasikara sy Torkia
Notanterahina nandritra fihaonana teo amin’ny Filohan’ny Repoblika Andry RAJOELINA sy ny Filoha tiorka Recep Tayyip ERDOGAN, ny fanaovan-tsonia fifanaraham-piaraha-miasa ho fampiroboroboana ny fifanakalozana ara-barotra sy fametrahana vaomiera iombonana ara-toe-karena eo amin’i Madagasikara sy Torkia. Noresahan’ny Filoha roa tonta ihany koa ny lalam-piaraha-miasa eo amin’ny sehatra hafa toy ny fotodrafitrasa, ny fizahantany, ny fambolena sy fiompiana, ny fiarovam-pirenena ary ny fanamboarana ny tanàna vaovao ao Imerintsiatosika.
Mampivondrona ireo Lehiben’ny Fanjakana sy ny Governemanta, ny minisitra, ny diplaomaty, ny lehiben’ny fandraharahana, ny akademia, ny eritreritra, ny solontenan’ny tanora ary ny haino aman-jery ho amin’ny adihevitra manerantany ity fihaonana ity.
Ny fandraisan’ny filoha Andry Rajoelina anjara tamin’ity hetsika iraisam-pirenena ity dia mampiseho ny fahavononan’i Madagasikara amin’ny raharaham-pirenena sy ny faniriany handray anjara amin’ny adihevitra maneran-tany. Manoloana ireo mpiara-miombon’antoka isan-karazany, ity fihaonana ity dia manome sehatra hifanakalozana hevitra, ary hanamafisana ny fifandraisana ara-diplomatika eo amin’ireo firenena mpandray anjara.
