Ambohimangakely, Antananarivo, faha 07 Avrily 2025 – Tolotra ara-pahasalamana maimaimpoana sy fanentanana ny mponina no nampiavaka ny fankalazana ny andro erantany ho an’ny fahasalamana.
Vao maraina dia efa tomefy olona ny tokotany malalaky ny CEG Ambohimangakely. Tonga hizaha ny toe-pahasalamany ny mponina. Saika nahitana filaharam-be avokoa nanoloana ireo tranoheva, indrindra ireo natokana ho an’ny vehivavy sy ny ankizy. Niompana ho azy ireo rahateo ny hetsika nomanina nandritra ny fankalazana. Lohahevitra iraisana manerantany ny hoe : « Fahasalamana mandritra ny fiterahana : miantoka ny ho avy feno fanantenana. » Nomena lanja ny fanaovam-baksiny ny ankizy, ny fizahana fahasalamana ho an’ny reny sy ny zaza ary ny ady amin’ny tsy fanjarian-tsakafo.
Nilaza ny solotena maharitry ny sampandraharahan’ny firenena mikambana momba ny fahasalamana OMS eto Madagasikara fa tokony ampitomboina ny tetibola ho an’ny fahasalamana manoloana ny fiatoan’ireo mpamatsy vola sasany. Nanteriny fa misy fiantraikany tsara ho an’ny toekarena sy ny fampandrosoana ny firenena ny fananana zaza sy reny salama. Mendrika fiainana tsara hatrany amin’ny fahaterahany ny zaza tsirairay. Zava-dehibe ny ny fikarakarana ara-pahasalamana ny zaza vao teraka sy ny fanaovam-baksiny mba hahazoany hoavy salama sy mamiratra.
Ho an’ny sampandraharahan’ny firenena mikambana misahana ny ankizy na Unicef, voalaza fa hamafisina ny fampiroboroboana ny fahasalamana ho an’ny reny sy ny zaza, amin’ny alalan’ny fitsaboana ara-pahasalamana mandritra ny fitondrana vohoka, ny fiterahana ara-pahasalamana, ary ny fanaovam-baksiny.
Ny ministry ny fahasalamana kosa no nilaza fa ezaka iaraha-manana ny fampiroboroana ny fahasalaman’ny reny sy ny zaza. Manasa ny vehivavy izy hanatona toeram-pitsaboana rehefa mitondra vohoka. Mandritra ireny fizahana ataon’ny mpitsabo ireny no hanarahana ny toe-pahasalamany sy ny zaza ao an-kibony. Amin’izany koa no hanomezana azy ireo vaksiny ilaina mandritra ny fotoana hitondrany vohoka. Tsy vitan’izay fa any amin’ny toeram-pitsaboana no antsoina hiteraka ny vehivavy. Aorian’ny fiterahana, zava-dehibe ny fanaraha-maso ny fahasalaman’ny reny sy ny zaza. Nisongadina nandritra ny lahateny fanentanana natao tetsy Ambohimangakely ireo rehetra ireo.
